Friday, May 4, 2007
شغلات تحر الواحد !!


ساعات تحر الشخص شغلات وده يقولها ...وساعات تحتر من شخص ودك تقوله بويه انت ترى تحرني


وانا بالي ناس حاريني ( وبقوله او بقولها انت او انتي ) ترى حاريني
وباطين جبدي زين ;p



وشغلات تحرني واشوفها دائم....ومنها


يحرني حجاب بنات هالايام..الراس وارم اللهم ياكافي من كبره

يحرني الريال العود الي يفرفر بالمجعات ويغازل بنات كبر بناته ...يالله حسن الخاتمه بس

يحرني الشخص الي يقول شخباري نكتب عربي مسجات ولا ايميلات كله انجليزي معرب

يحرني الشخص الي وصل عمره مليون ومايصلي ...ماتخاف ربك شنو

يحرني الشخص الي يسمع اغاني انجليزيه ومايفهم منها شي

يحرني الشخص الي يوقف لي صار حادث بالشارع بس عشان يطمش ...ياحبكم لطماشه

يحرني الشخص الي يحاسب بالجمعيه وعربانته متروسه وانا معاي بيبسي ومايخليني احاسب قبله ;/ نحيس

تحرني خدامتنا لما تقعدني من النوم لانه اذا بتقعدني تسوي لي عمليه رعب

يحرني صوت المغني رابح صقر

يحرني الشخص الجذاب ...الجذب حبله قصير ترى

تحرني كلمه هذا اصيل ولا لأ...مادري انت من القمر واهو من المريخ مثلا


يحرني المكياج الاوفر يسبب لي ضيق تنفس اذا شفته ;p


يحرني الي يدخن بمكان ممنوع التدخين..مسأله عناد بأغلب الاوقات


أحتر اذا رحت السوق ومالقيت شي اشتريه



واخر شي
يحرني دوامي لانه سكر المسنجر ;p


وانتو شنو يحركم شاركوني حراتكم ؟؟؟؟
:P
.
.
.
وبالي كلمه ودي اقولها ...... لودامت لغيرك ما تصلت اليك ....يالي فبالي :)



 
posted by ::heba:: at 2:52 PM | Permalink |


15 Comments:


  • At May 6, 2007 at 9:02 AM, Blogger Kuw_Son

    لا لا لا يا هبة كل شي و لا تنبط جبدج :)

    صرخي من قمة راسج انتوا باطين جبدي ولا تسكتين أبدا
    :P

    والله أظن أغلب اللي طرحتيه موافق عليه ..

    و حتى أكون وياج صريح .. بمشي مع النقاط وحدة وحدة ..

    الحجاب بو هرم أو قوطي نيدو !! لا تعليق

    و الريال اللي كبر يدي يتفرفر بالمجمعات !! نسأل الله الثبات و العافية و حسن الخاتمة

    و أنا شخصيا أكتب بالعربي و بالانجليزي .. بس ما أقول شخباري .. لأنه هذي لغتي و لازم أعتز فيها

    و اللي وصل مليون و ما يصلي .. الله يهديه ..

    يقول الرسول صلى الله عليه و سلم ..
    أعذر الله إلى امرئ أخَّر أجله حتى بلَّغه ستين سنة

    يعني ماله عذر بعد الستين !!

    و هذي سالفة الصراحة .. تلاقين واحد واقف بالإشارة يمج و منزل الجامة و السيارة تهتز من الأغاني الإنجليزية و شكله و ويهه يدل انه ثانوية ماعنده !! و ما يدري الله وين قاطه !!

    و الحوادث و بلاغة الشف .. متلازمين لا ثالث لهما في ديرتنا
    :P

    و وايد في نحس في الجمعيات ..
    أنا ساعات أتعمد أتزنقح و أمشي جدامه و أوريه اللي عندي علشان يفطن و يفتهم !!
    ولا حياة لمن تنادي ..
    في بعض الجمعيات حاطين كاشير للي يشتري مثلج بيبسي ولا ككاو ولا شغلى وحدة أو ثنتين .. بس للأسف جمعيتنا ما وصلت لهذا المستوى !!

    أشوة ما عندنا خدم في بيتنا
    :P

    و هذا رابح صقر عاد نفسه مغني !!؟
    لا أداءا ولا صوتا ولا شكلا الحمدلله والشكر !!
    و مو بس أهو !! فيه وايد براسي بس ماني متكلم

    ذكرتيني بأغنية مدينة الرياح ..
    يوار يوار وافتيني
    :P
    اللي يجذب أحس انه مريض و فيه نقص

    و أذكر
    عن ابن مسعود رضي الله عنه عن النبي صلى الله عليه وسلم أنه قال : (عليكم بالصدق ، فإن الصدق يهدي إلى البر ، وإن البر يهدي إلى الجنة ، وما يزال الرجل يصدق ويتحرى الصدق حتى يكتب عند الله صديقاً ، وإياكم والكذب ، فإن الكذب يهدي إلى الفجور ، وإن الفجور يهدي إلى النار ، وما يزال الرجل يكذب ويتحرى الكذب حتى يكتب عند الله كذاباً "

    رواه البخاري

    و كلكم لآدم و آدم من ترااااب .. هذا ما قاله الرسول صلى الله عليه وسلم
    “كلكم لآدم وآدم من تراب، لا فضل لعربي على أعجمي ولا أعجمي على عربي، ولا أحمر على أسود، ولا أسود على أحمر إلا بالتقوى”.

    رواه أحمد في مسنده

    يأذيني كرجل أن أرى فتاة متزينة ع الآخر
    والله فتنة .. الواحد يخاف على دينه و إيمانه من كثر ما يرى هذه المناظر المقززة والتي تتعب الناظر إليها !!
    أكره الذهاب إلى المجمعات من غير ضرورة لتلافي هذه المناظر المؤذية

    و المدخن في المكان الغير مخصص له أو في مطعم بالذات هذا انسان وقح وقليل أدب ولا أتراجع عن ما قلته أبدا

    و هذي شغلة اني ما ألقى شي في السوق ما تنطبق علي
    :P
    الله يعينكم في حفلات الاستقبالات أو العروس أو العيد
    :P

    و بالنسبة للمسنجر .. عندنا و عندج خير ..
    من رآى مصيبة غيره هانت عليه مصيبته
    :P
    ارتاحي مو بس انتي :)

     
  • At May 6, 2007 at 2:48 PM, Anonymous kechie-chan

    الله !
    كل هذا بقلبج و ساكته ؟
    يا حياتي , فضفضي يمه ..و لا تحرين نفسح أول و تالي الدنيا ما تسوى

    من فوق لي تحت و أنا أتكركر كل ما قريت شي قلت صاجة بس صح ضحكتيني عالمكياج الأوفر مالومج ;p
    و اللي روسهم مورمه وعليا Kaaak اللهم لا شماته عسى الله لا يبلينا بس =P

    حرتني "فلاته" قبل الأمس ..موصينها لا يطلع الخبر ما صار اليوم إلا اللي بأمريكا دروا ;X
    الله المستعان =\

    akBaR skiP .. و الله ما تسوى علي يصير فيني شي من الحره .. طاف و ستين طاف أحر قلبي حق منو ؟
    انتي طوفي و لا جنج تشوفين =P

     
  • At May 7, 2007 at 12:47 AM, Blogger Sheikha85

    osxuyxfموضوع حلوو يا حلوو :Pp
    والله بهالزمن وااايد اشياء تحرني :\

    يحرني الريال اللي شعره طويل لا وعنقوصه بعد
    (ريايل اخر زمن)

    يحرني الشخص اللي يسوي نفسه فيلسوف عارف كل شي واهو كمخ مايعرف شي
    (يعني انا الفاهم وماكو مني )

    تحرني كليتنا بالتخلف اللي فيها
    (ولله لو اقولكم سالفة اطقون على روسكم معقوله هذا بالكويت !! )

    تحرني البنية المتحجبه ولابسه ثري كوارتر
    (يعني استايل )

    يحرني الريال طول بعرض ماكو شوارب
    ( اسم عالفاضي)

    يحروني بنات الكليه اللي ايون ويا السايق وماتنزل الا عنندددددددد الباب ويا قرادتي اذا صرت وراها
    ( راحت علي المحاضره على مانزل ست الحسن والدلال )

    تحرني هبونه لما اقولها طولالي تقولي طرم طرم
    ( اموت عليج وانتي معاي عالخط :p )

    بس تعبت اذا تذكرت شي بعد بكتب :p

     
  • At May 9, 2007 at 9:40 AM, Blogger ::heba::

    Kuw_Son

    لوووووووووووول
    والله ياخالد وقوفك على كل نقطه
    ونسي وبنفس الوقت حسيت في ناس
    مضايقه من الشغلات الي مضايقتني
    :p

    انا مادري هالشغلات متى بتنتهي :/

     
  • At May 9, 2007 at 9:43 AM, Blogger ::heba::

    kechie-chan

    لووول اي والله بقلبي واكثر
    :P
    الله ادري وايد شغلات تحرنا
    وبالنسبه للي خلت الي بأمريكا يدرون
    فعندي وعندج خير

    انا اعرف وحده كل ماقلت لها شي
    اتفاجئ باليران كلهم دارين :P

    وبالضبط كل شي يحر لازم نعطيه طاااااااف
    وطاف قوي عشان نرتاح ...

    :)

     
  • At May 9, 2007 at 9:47 AM, Blogger ::heba::

    Sheikha85

    طولالي :P

    هلا يما امري تدللي
    لووول .. صح وايد شغلات تحر
    وايد شغلات تبط الجبد بس لازم نعطيهم طولالي عدل :p

    وعلى طاري الريال بوشعر طويل
    شفت مره واحد ريال شعره بدون مبالغه اطول من شعر زينب العسكري وكان فاله ولابس تاج.... الله شنو شكله يبب الامراض

    :/

    لوووووووووووول
    وعلى طاري طولالي وطرم طرم
    فانا دايما على الخط صج ساعات اضيع بس
    القى نفسي مره 2 :pppp

     
  • At May 10, 2007 at 5:21 PM, Blogger Nescafé

    هبه كنت بعلق على نقطة الراس الوارم لاني اشوفهم كل يوم معاي بالدوام
    يااااكثرهم.. على فكرة وصلنا لي درجة ان انا ورفيجتي نعدهم من الفضاوه ;P
    حدهم يأزموني.. بس ودي اعرف شنو داخل الملفع

    بعدين صراحة صعقت لما قريت عن اللي شعره اطول من زينت العسكري!! معقوله
    لالا تأزمت لما تخيلت الوضع.. شلون انتي شفتيه.. احس شكله مؤرف الحمدلله والشكر

    وايد اشياء تحر.. واكثر شي يغثني لقافه الاوادم الزايده مشالله في ناس بكل شي يدخلون خشمهم وعادي ولا كأن في شي غلط بالموضوع!؟

    ويحروني اكثر الناس اللي يلقطون الكلمه ويفهمونها على الطريقه اللي يبونها وبنفس الوقت كلامهم محد يحاسبهم عليه!

    اما الخدم مشكلتي معاهم أزليه.. اصلا انا بسوي لي روبت احسن منهم ;P

     
  • At May 11, 2007 at 3:13 AM, Blogger ::heba::

    Nescafé

    لووووووول والله مالومج يوم انج ا ويه رفيجتج قعدتوا تعدونهم لووول
    صايرين مشالله وايد لووووول
    وحسب ماسمعت داخل الملف قوطي روب وشباصات ام ورده حجم اكسلارج :p


    لوول نسكافيه لاتنسين شبيه شعر زينب العسكري لابس تاج وفال شعره لوول شكله قمه بالتأزيم :p
    انا حسيت ان شعره ريحته خايسه


    وعلى قولتج لقافه الناس تسبب تأزيم وحتى الناس الي تفهم الي تبي على كيفها تسبب تأزيم

    ويبيله روبوت والله
    اذا سويتي واحد طلبي لي معاج :p

     
  • At May 12, 2007 at 4:13 PM, Blogger Q8ya

    وااااي انا احتريت يوم قريتهم هههه


    بس اشقصدج ابـ

    يحرني المكياج الاوفر يسبب لي ضيق تنفس اذا شفته

    ما فهمتها @@


    ====

    اقولج انا دوامي بعد سكروا علينا المسنجر بس على مين يا بابا هههههه

    هذا موقع دشي منه على المسنجر ...انا كل يوم اشبك منه من الدوام

    www.ebuddy.com

    نياهاها

    ;PpPp

     
  • At May 13, 2007 at 5:33 PM, Blogger Parallax1

    هاهاهاها أما أنا فيقهرني الي يمشي على الحاره اليسار ٨٠ و يقول ليش مستعيلين

     
  • At May 14, 2007 at 9:28 AM, Blogger ::heba::

    Q8ya
    لوووووووول
    احياج الله كويتيه :")
    بخصوص المكياج الاوفر لوول
    انا اقصد اذا شفت وحده حاطه مك اب واااايد احس جنه قاعد على قلبي انا
    احس جنها وعليه مختنقه من كثره على ويها ;/


    لووووول
    من له حيله فليحتال
    لووول شكرا شكرا على سايت راج اجربه بأقرب وقت ممكن :PPP

     
  • At May 14, 2007 at 9:30 AM, Blogger ::heba::

    Parallax1
    لووول على الطاري الي يمشون يسار ويدوسون 80 انا صارتلي وايد ولما تلزق بالسياره عشان توخر يقولك برود شفيك شفيك :pp

    ادري ادري يحرون :p

     
  • At July 30, 2007 at 11:33 AM, Blogger Sara

    يحروني الناس اللزقة اللي مايفجون لو تحقرينهم لي بعد 100 سنة يظلون وراج وراج ما عندهم كرامة

    يحروني الناس إللي ما يتسلطون إلا اذا شافوج لاهية وعندج شغل

    يحروني الناس اللي يحننون

    يحروني اللي يخزون بسبب ومن غير سبب بالذات اذا كنتي بالصالون او بالطبيب وتجابلج وحدة تخزج

    ويحروني اللي يلفون عليج بالشارع ومايهمهم

    وايد اشياء تحرني .. اسمله عليج من الحرة وخوش بوست :)

     
  • At August 11, 2007 at 12:08 AM, Blogger Hamoora

    لوووووول

    والله ضحكتيني من صج
    ههههههههههههههههههه
    والله صاجه
    كل اللي قلتيه يحر الواحد

    يعطيج العافية

     
  • At August 26, 2007 at 10:08 PM, Blogger Neyoma

    إي والله صاجة بكل كلمة قلتيها

    أما على سالفة الحجاب مادري شعاجبهم فيه
    هذاك اليوم رايحة الطبيب ولا أشوف وحدة راسها شكبره
    هاذي بالطبيب جذي عيل لو مكان ثاني شنو بتسوي
    حتى بالمدرسة أشوفهم

    " يحرني الشخص الي يقول شخباري نكتب عربي مسجات ولا ايميلات كله انجليزي معرب"
    إيي ولا لما أقول حق وحدة كتبي عربي ..
    تقول ماعرف ! أقط بدليات !

    " تحرني خدامتنا لما تقعدني من النوم لانه اذا بتقعدني تسوي لي عمليه رعب "
    اييي ولا لما تقعدني و يكون ما عندي مدرسة ما أنام عقبها !
    ولا لما تقعدني عشان أقعد اختي حق المدرسة :p
    لان نومي خفيف و اختي مشالله عليها لو اصارخ بأذونها يالله تقوم
    عقب أطلع حرتي بأختي خخخخخخ