Tuesday, August 21, 2007
عندما تتحول احلامانا الورديه الي حقيقه ....حوار مع انسانه راقيه



الساعه 6 ونصف الوقت يسير ببطء ارتشفت اخر ماتبقى من قهوتي وأنا أقلب صفحات أخر كتاب بيدي..هدوء قاتل وصمت مطبق بأرجاء المنزل ..تناولت مفتاح السياره وخرجت لأقرب مكتبه بالنسبه لي وكانت من نصيب مكتبه جرير..بالاونه الاخيره بدات أدمن على زياره المكتبات والاطلاع على اخر الكتب الثقافيه الادبية الاجتماعيه والتاريخيه وكذلك الروايات تطور غريب اجتاحني ..ولا انكر انه تطور ممتع بالنسبه لي : )


عند وصولي للمكتبه ترجلت من السياره ..وماهي الا ثواني وانا بالداخل المكان هادئ نوعا ما ...هناك سيده عند الكاشير وهناك اثنان من الشباب عند اجهزة الكمبيوتر ..رجل كبير بالسن وبيده عدسه كبيره يقلب الكتب القديمه المعروضه بنصف سعر فتاة صغيره مع والدتها تتوسل اليها لتشتري لها تلك اللعبه ...لا اعلم لماذا شعرت بأرتياح غريب وانا هناك بذاك اليوم.. توجهت لأقسام الكتب المختلفه وبدأت بأختيار ما أريد وعندما وصل عدد الكتب بيدي
الي عشرة كتب توجهت لأقرب استراحه جلست وبدأت أطلع على محتويات الكتب لأخذ المهم منها وترك الباقي


وخلال تصفحي تلك الكتب ..اقتربت مني سيده وجلست بجواري ..كانت بأوائل الاربعينيات ولا انكر بأنها تعطي عمرا
أقل من عمرها فلقد كانت أمراة جذابة من ناحية الشكل والمظهر فـأكثر ما شدني اليها أناقتها وجاذبيتها ..فتحت حقيبتها الشانيل واخرجت نظارتها الطبية وبدأت تقلب صفحات الكتب التي بيدها...كنت انظر لما تحمله من كتب واختلس النظر بما بيدها من كتاب( لقافه نوعا ما :)...نظرت الي وابتسمت..بادلتها الابتسامه ورجعت اقلب بما يدي من كتب ..

--------------
فجأة رن هاتف تلك السيده اغلقت هاتفها بسرعه ونظرت الي
وقالت :اسفه اسفه

اجبتها بأبتسام : لا عادي اخذي راحتج

ابتسمت وقالت : تدرين لو احنا بأمريكا جان سو سالفه خاصه بمكان في في ناس تقرى وتنتقى هذي الكتب العلميه

انا : الكويت غير وامريكا غير


ابتسمت وقالت : صح وبدون مقدمات قالت جم عمرج ؟؟شكلج صغير ومعاج كل هالكتب ونوعيتهم ثقافيه


ابتسمت لها وقلت :الثقافه والقرايه براي مالها عمر معين سواء صغير او جبير

هي : صحيح بس الشباب عندنا بالكويت نادر ما اشوفهم يطلعون خاصه الي بسنج اغلبهم بالمجمعات والمطاعم

انا : اهو في بنات وفي شباب يقرون ويطلعون واعرف منهم وايد ..واحتمال يكونون اقليه لانه ماعندي فكره عن حجم
الناس الي تهتم بالثقافة

هي : اهم اقليه اكيد والطاغي من الشباب يكره الثقافه او يحب يكون مغمض .. انتي شنو تدرسين؟


انا: خريجه اعلام تخصص اذاعه وتلفزيون وحاليا احضر لدراسه الماجستير

هي : مشالله شي جميل والله ..عيل انا دكتور حديثه توني اللتحق بسلك التدريس الجامعي ..يعني اقدر اقول راح تكونين زميله لنا بالجامعه مستقبلا ..وابتسمت

انا : ضحكت وقلت لها انشالله لانه ودي اكمل دكتورا

هي : لا تقولين ودي ..قولي بكون دكتوره مستقبلا

انا: انشالله ياريت اقدر اكون دكتوره مثل حضرتج

هي : انا أدري بتكونين دكتوره


انا :ابتسمت لها وقلت لها دكتورة اقولج شي وماتضحكين علي أنا احس انج يايتني من السما اليوم

هي : ضحكت وقالت ليش

انا : لانه اليوم حاسه باحباط نوعا وعشان جذي كل ما احس بأحباط اروح اي مكتبه واشتري واقرى كتب

هي: ضحكت وقالت تدرين عيل انتي هم هدية من السما لي اليوم

انا : باستغراب شلون

هي: انا ياييه المكتبة بشتري كتب معينه لاني احضر لدراسه عن الشباب وبنات الكويت خاصة بعد دراسة اجراها زميل
لي بالجامعه احتلت نسبة80 %من شباب الكويت سطحي وغير طموح والنسبه الباجيه موزعه الي مثقف مطلع
وقارئ وانتي واحد من النماذج هذي والي ابيها معاي بالدراسه

انا : ابتسمت لها وقلت ساعات الصدف تكون خير من الف ميعاد انا يشرفني اكون معاج وسعيده من كلامج وتشجيعج لي

------------------------------

وقبل ما اطلع من المكتبة يتني الدكتورة ومعاها كتاب صغير عطتني اياة اسمه كتاب التغير

وقالت لي: هذا كتاب هديه مني لج يادكتورة هبه

ابتسمت لها : وقلت لها : مشكوره دكتوره وايد ..على كلامج لي وعلى اللقب الي عطيتيني اياه قبل وقته

قرصتني وقالت هذا لقبج المستقبلي وانت بتاخذينه لامحاله ..ابتسمت وقالت اقري الكتاب وراح تعرفين شنو اقصد

هذا نص بعض مما دار بيني وبين الدكتوره..احيانا نلتقي فجأة ودون سابق انذار بأشخاص يعطون دفعه قويه جدا للأمام ويساعدونه اذا احتجنا لهم ونساعدهم اذا احتاجوا لنا
: )

ومن خلال قرائتي للكتاب فهمت وايد اشياء كنت غافله عنها ..كتاب عباره عن كلمات وعبر بكل صفحه
حكمه وكل حكمه تكون لها معنى قوي حيل .بالاضافه الي وجود قائمه تكتبها بالاخر عن عن قراراتك واهدافك

كتاب مشوق ويصلح للجميع









كتاب سيحدث لكم الكثير من التغير خاصه للذين يهتمون بنوع هذا من الكتب

وبالاخر كلمه شكر بحق هذي الانسانه الطيبة

شكرا من كل قلبي على كل كلمه دفعتني للأمام وشكرا على اجمل هديه تلقيتها واجمل اهداء من اجمل دكتوره :)


كلمه اعجبتني جدا بالكتاب

كل شي في بدايته حلم

 
posted by ::heba:: at 11:35 AM | Permalink |


39 Comments:


  • At August 21, 2007 at 1:46 PM, Blogger 5roofa

    يحليلهاا واااي حبيتها وانا ماعرفهاا

    الكتاب شكله يشوق بس في بالانجليزي صح؟

    شكلي بروح اليوم بشتري مدامي فاضيه و خلصت كل قصه عندي

    :)

    o enshala enshofej dr soon

    good luck

    salamz sweetee....

     
  • At August 21, 2007 at 4:25 PM, Blogger Sulaiman_Q8

    مشاء الله اعتبرج محظوظة بهذه الفرصة الي لا تقدر بثمن صراح فرصة ذهبية اختي هبة
    اقصد الدكتورة هبة
    وانشاء الله تحققين كل طموحاتج وتوصلين للي تبينة

    وكناب التفير راح اضيفة الى قائمة كتبي انشاء الله
    اذا كنتي من محبي قراءة الكتب
    انشاء الله راح ارسلج عنوان
    bookclub
    وتشوفين انواع الكتب الي تحبينها وتناقشان الكتاب بعد ماتقرينة صراحة وايد استفدت من هذا الموقع

    والبتوفيج انشاء الله

     
  • At August 21, 2007 at 4:41 PM, Blogger U_SF

    دكتوره هبه انتي فعلاً كنز وما منّج اثنين ..

    كوني على يقين يا دكتوره ان هذا اللقاء لم يكن صدفةً أبداً ..

    انما هو قدر قد قدّر لج للقاء د.الفارس

    لقاء كان جميل وهادء وانشالله من بعد هذا اللقاء والكتاب انشوفج انسانه قد وصلت حدود السما في صعودها ..

    مو بس ثقافياً بل فنياً ايضاً ..

    نبي نشوف استيديو د.هبه بأقرب وقت انشالله : )

    من هذه اللحظه ورايح وانتي د.هبه الجدعان

    أتمنى لج التوفيق في حياتج كلها ^_^

     
  • At August 21, 2007 at 6:44 PM, Blogger TReSTeN

    انشالله تكونين دكتورة الغد

    وبالنسبة للتغييير

    انا وااحد من النااس اعترف بفشلي بهالجانب

    دايما احاول اتغير ولكن دون جدوى
    وعمري ماتخلصت من سلوك ماحبه

    وللاسف كل شي يلازمني للحين

    واذا الكتاب مفيد نصحينا خل نستفيد

     
  • At August 22, 2007 at 12:29 AM, Blogger Sheikha85

    عسى الله يرزقج الخير على قد نيتج يا هبه ونشووفج بروفيسوره مو بس دكتوره
    والله تستاهلين كل خير وماكو شي صعب ومستحيل بالاراده والاصرار كل شي يتحقق وانتي طموحه وان شاءالله تتحقق احلامج :)

    اقدر اقول فرصه ذهبية كانت بنسبة لج وللدكتوره واذا ماني غلطانه اهي دكتورة بكلية الهندسه :)
    صدفه جميله والأجمل الحوار اللي دار والهديه المتواضعه بثمنها وقيمه بمحتواها

    وقوليلي اجمل كتاب قريتيه من بين ال 10 اللي خذيتيهم :))

    الله يوفقج

     
  • At August 22, 2007 at 1:04 AM, Blogger ::heba::

    5roofa

    وانا بعد حبيتها :)
    الكتاب اساسا انكليزي
    واسمه
    the book of change

    ولكن هذي النسخه المعربه منه :)
    انا انصحج فيه كتاب قيم رقم انه
    قليل المحتوى اللهم مجرد عبارات..وعبر
    وبعض النقاط المهمه....

    كتاب ممتع الصراحه ومفيد :)
    تسلمين على مرورج الحلو : )

     
  • At August 22, 2007 at 1:07 AM, Blogger ::heba::

    Sulaiman_Q8

    اول شي حياك الله اخوي سليمان بالمدونه معانا :)


    مشكور على اللقب الظاهر مو بس
    د .غاده عطتني اياه وانتوا بعد :)

    انا فعلا سعدت جدا بالحوار الي دار بيني وبينها وسعيده لاهتمامها رغم عدم معرفتها فيني ..لكن هذا مايدل الا على رقي اخلاقها

    انصحك بالكتاب وهو للجميع المستويات
    وانا من محبين الكتب وانشالله ترسلي العنوان واطلع على الكتب الي هناك

    مشكور على معلوماتك وعلى حظورك عزيزي
    منور المكان :)

     
  • At August 22, 2007 at 1:34 AM, Blogger ::heba::

    U_SF

    مشكور يا يوسف
    ومشكور على اللقب دكتوره

    شكلي بصير دكتوره قبل وقتي :D

    اكيد انا احس ان اللقاء كان شي الله كاتبه لي وبالذات باليوم هذا ..انا احس انها صج هديه من الله في ذلك الوقت

    تسلم يا يوسف على كلامك الطيب
    وانشالله اكون دكتور واحقق الي ابيه
    وانشالله لك المثل يا يوسف وتحقق كل الي بالك مشكور من قلبي يا اخوي العزيز : )

     
  • At August 22, 2007 at 1:37 AM, Blogger ::heba::

    TReSTeN

    انشالله ولك بالمثل لكل ماتريد عزيزي

    غلط انك تقول عن عمرك فاشل
    لانه الفشل ماهي الا اول خطوات لتحقيق النجاح

    الكتاب بفيدك اكيد
    اقتنيه واقرى وراح تفهم قصدي

    وابي اعرف وجهه نظرك عقب ماتقرى
    نقاط التغير..!!

    الله يوفقك انشالله وبعد عنك هاجس الفشل
    لتحقق النجاح :)

     
  • At August 22, 2007 at 1:46 AM, Blogger ::heba::

    Sheikha85

    تسلمين ياشيخه على كلامج الطيب
    وانشالله لج بالمثل وتحقق كل امانيج

    ومثل ماذكرتي بالاراده والاصرار نحقق اهدافنا حتى لو كانت مستحيله

    والله انا احس بنفس الشعور هذا ...احس التقائي فيها فرصه ذهبيه ودفعه قويه حيل لي

    والهديه رغم بساطتها الا انها معنويا تعني لي الكثير الكثير :)

    الكتب ياشيوخه صفيت منهم على 6
    كتب حلوة ومتنوعه حاليا قاعده اقرى بكتابين حلوين

    الاول روايه حلوة للمبدعه دانيال استيل

    والكتاب الثاني كتاب انصحج فيه
    when frindship hurts
    ومنه نسخه معربه بعنوان عندما تكون الصداقه مؤلمه وكيف تتعامل مع الصديق الذي يخونك او يتخلى عنك او يجرحك واهي للدكتور جان ياجر

    وكتب الثانيه متنوعه مابين القدرات العقل الباطن والعلاج بالالوان وحاليا
    قاعده اقرى باول الكتابين الي ذكرتهم لج
    واذا يا دور للياجي راح اقولج عنهم اكيد :D

     
  • At August 22, 2007 at 2:34 AM, Blogger QiYaDiYa

    cweمكتبة جرير من اروع الأماكن الي احب اروحلها ..

    عالم ثاااني ..

    استمتع جدا لما اروحلها ..

    افصفص كل شي فيها ابتداءً بالاجهزة و انتهاءً بالالوان و المشغولات اليدوية ..

    و الموقف الي صار رسالة من رب العالمين ..
    عشان يرفع همتج ..
    و يخليج دايما متذكره هدفج ..
    و اتوقع انج ما راح تنسينه طول عمرج ;)


    والله يا هبة تستاهلين كل خير ..
    و من الحين و رايح دايما بسميج الدكتورة هبة ..
    حتى اسمح بالموبايل بخليه الدكتورة هبة ..

    توني ادري انه انه بتكملين دراستج ..
    و هالشي اسعدني حيل ;D

    الله يوفقج و ييسر لج كل خير يا رب ..

    ;***

     
  • At August 22, 2007 at 3:01 AM, Blogger ::heba::

    QiYaDiYa

    المكتبه هذي انا احبها بعد لانه كل شي القاه فيها :D

    واكيد انا احس بعد انها رساله من الله
    عشان يذكرني دايما بهدفي وما اتنازل عنه لاسباب ثانيه...وكلمه شكر ماتوفي حق الدكتوره غاده : )


    هاهاها يابختي والله
    انا صرت دكتوره قبل وقتي :P
    عيل كل ساعه بدق عليج عشان يطلعلج
    د.هبه call u:P

    مشكوره قياديه على مرورج الحلو وكلامج الاحلى ...وماحصل وقت اقولج اني بكمل والحين دريتي :D

    الله يوفقج ويسعدج وويسر امورج يالغاليه :****

     
  • At August 22, 2007 at 11:55 AM, Blogger جنون إحساس

    الله فرصه ذهبية صراحه أغبطج عليها
    ^_^ تصادفين أشخاص ماتعرفينهم لكنهم يمدونج بكلمات ويشجعونج بطريقة تحفزج
    يمكن أقرب الناس لج ما قدروا يبثون فيج الروح اللي بثتها هالإنسانه


    واصلي طريجج وحققي ما تتمنينه
    ماكو شي أحلى من الإنجازات
    هنيه تبين قيمة الإنسان في مجتمعه

    :)

    بالتوفيج يا دكتورة هبه

     
  • At August 22, 2007 at 1:14 PM, Blogger Kuw_Son

    تستاهلين كل خير يا دكتورة هبة ..

    فعلا صدفة خير من ألف ميعاد !

    بالتوفيج ان شاء الله ..

     
  • At August 23, 2007 at 3:12 AM, Blogger MANAF

    والله يا هبه

    في لحظات تمر الانسان يقعد فيها مع نفسه

    ويسأل روحه هالسؤال

    غيري احسن مني

    الجواب

    اكيد لأ

    ..

    كلنا نقدر نكون الافضل والاحسن

    بس محتاجين انه نمر بهاللحظه

    اللي نعقد فيها نية التطور الذاتي

    السؤال

    هل تستطيعين ذلك

    الجواب

    نعم تستطيعين

    موفقه انشالله





    خارج الموضوع
    انتي اي دفعه؟؟

    :)

     
  • At August 23, 2007 at 6:27 PM, Blogger KeChie-ChaN

    المكتبة أو كما أسميها القلعة السحرية
    عالم مليء بالسحر و الجمال و الإثارة
    حلم أنسجة من القصص و شخصيات رائعة كالموجودة في عالم أليس و بلاد العجائب..حلو أستمر في تأملة فترة طويلة قبل أن أمسك بيدي كتاباً أقرأة ..!

    صدقيني مو مجاملة .. إن من الناس اللي وجودهم نادر عالأرض ..ماشاء الله عليج

    بالتوفيق دكتورة ; )

     
  • At August 23, 2007 at 6:54 PM, Blogger Shaima'a Alkandari

    hوناسه موقف حلو للغايه

    يخليج تتفائلين بمستقبل مشرق وجميل

    وشكله الكتاب حلو

    بشتريه واقراه باذن الله

     
  • At August 24, 2007 at 12:12 AM, Blogger ::heba::

    جنون إحساس
    كلامج عدل وانا حسيت هالشي معاها
    ودائما مواصله الطريج اهي احد
    اهم الاسباب لتحقيق اهدافها ...

    مشكوره على اللقب :D
    ثبتوا الفكره بالي :p

    يعطيك العافيه ومشكوره على المرور : )

     
  • At August 24, 2007 at 12:15 AM, Blogger ::heba::

    Kuw_Son

    الف شكر لك اخوي خالد
    اكيد الصدف بالحياه روعه اذا كانت
    مثل هذي ...وفعلا صدفه خير من الف ميعاد

    تسلم على مرورك اكيد اخوي
    ومشكور على اللقب :D

     
  • At August 24, 2007 at 12:28 AM, Blogger ::heba::

    MANAF

    كلامك عين الصواب يامناف

    الواحد بمختلف مراحل عمره

    لازم يمر بوقت يوقف فيه

    نحبط او يفكر يوقف


    لكن ساعات تصادف

    ناس تدفع وبقوة

    لتركيز على هدفك من يديد


    واكيد انا استطيع وانت تسطتيع
    والكل اهني وبره يستطيع انه يحقيق النجاح :)

    انا دفعه 2000
    واعرف نص الدفعه :p
    والدكاتره بعد :D

     
  • At August 24, 2007 at 12:30 AM, Blogger ::heba::

    KeChie-ChaN

    هو عالم مليء بالاسرار
    وفك طلاسمها ماهي الا متعه كبيره جدا
    بالنسبه لي كماهي بالنسبه لك.. :)


    مشكوره كريتفيا على كلامج
    الطيب ..واذا انا من الناس الي نادر
    وجودهم..فأنتي من الناس مستحيل نلقى
    نفسهم بتاتا :")

    شكرا على اللقب
    :D

     
  • At August 24, 2007 at 12:32 AM, Blogger ::heba::

    Shaima'a Alkandari

    تبين الصج انا اعتبره
    من اجمل المواقف بحياتي
    او بالاحرى اعتبره يوم مستحيل انساه


    والكتاب روعه لايطوفج : )

     
  • At August 24, 2007 at 1:05 AM, Blogger فراوله

    مساالورد والجوري
    غاليتي
    هبونة
    جميل ان نلتقي بأناس يغيرون بحاتنا
    شي ما قد يكون نقطة تحول بمستقبلنا
    وانتي ماشاءالله عليج وعيني عليج بارده
    انج من الناس المحظوضين باذن الله تعالي
    نتمني لك حياة جميلة بمستقبلكي
    المشرق
    يادكتورة المستقبل
    دمت بدفء وعذوبة
    ابدا
    :)

     
  • At August 24, 2007 at 7:24 AM, Blogger vancouver

    الدكتورة هبة ،، هههه
    :))

    الله ينولج اللي ببالج

    واااايد احب هالنوعية من الصدف اللي
    تجمعنا مع ناس يعطونا دفعة قوية بالحياة
    ونظل نتذكر اثرهم الطيب في نفوسنا



    يا حلوها ويا حلوج ويا حلو بنات ديرتي والله


    الى الامام يا هبة والشيء ترى
    مو صعب ابدا ، استمري

     
  • At August 25, 2007 at 3:44 AM, Blogger ::heba::

    فراوله

    لا اعلم لماذا احب
    تواجدك هنا ...افرح
    جدا بمرورك ...:)

    الحياه تتوقف احيانا
    معانا ..او نحن من نريد ان نوقفها
    ولكن يشاء القدر بأن يدفعها مجددا

    كما حدث معي

    شكرا على اللقب فراوله

    ودي اقولج شي
    انتي انسانه تدش القلب:)

     
  • At August 25, 2007 at 3:51 AM, Blogger ::heba::

    vancouver

    امين وياج انشالله :D

    الصدف الحلوة تبقى بالقلب ما تنمحي ابدا من ذاكرتنا :)

    عكسها عكس الصدف الاخرى التي
    لايبقى لها تواجد بمرور الوقت :)


    وانتي بعد ياحلوج وياحلو تواجدج:)

     
  • At August 25, 2007 at 12:44 PM, Blogger Roshal

    دائما لما ادخل هالبلوق !
    ادخل على راحه نفسيه فضيعه، وامل كبير
    ومتجدد بالحياه , من انسانه راقيه
    تحمل قلب رائع او باالأحرى ( كنز ) مو عادي !

    صدقيني كلنا معاج د.هبه !
    لغايه ماتحققين مبتغاج !

    والله يوفقج دكتوره (:

     
  • At August 25, 2007 at 3:18 PM, Blogger Ni3Na3aH

    ya7lail hal docotora wehe msakra mobileha 3ashan la tz3ej a7ad!! Qema bil adab!
    o inshallah t9ereen dctorah;D
    bil tawfeeg:)

     
  • At August 26, 2007 at 10:05 AM, Blogger Ra-1

    That is SO sweet :)
    سبحان الله الصدف غير المتوقعة حلوة
    ومرات نتعلم أشياء وايد من ناس ما نعرفهم
    يا دكتورة يالكشخة ;)

     
  • At August 27, 2007 at 12:42 PM, Blogger عيون الحب

    سبحان الله كيف صدفة اثّرت وغيرت فيج هالكثر

    يعني كلمة من غريب قد يكون لها اثر كبير يمكن اكثر من شخص قريب وحوالينج

    اي انسان في قرارة نفسه تكون عنده اهداف وطموحات يمكن هو مايعرف عنها

    حوار مع اي شخص ممكن يطلع ما بمكنون قلبه ويفتح عليه ابواب كانت مسكرة او ماكان حامل مفاتيحها

    حبيت الحوار اللي دار بينج وبينها
    وحبيت ثقتها ودفعها لج بالرغم من عدم معرفتها فيج

    بس سبحان الله يمكن هذي اشارة لج انج تواصلين ما بدأتي فيه
    وتبدين تحققين حلمج وتصيرين دكتورة

    كل التوفييق لج عيوني

     
  • At August 28, 2007 at 2:07 PM, Anonymous khaled

    جميل ماحدث
    وكأنـي رأيت تفاسيل الموضوع بعيني
    الصدفة تكون جميلة مع اشخاص ترتاح لهم المشاعر ...

    لك كل الود

     
  • At August 29, 2007 at 3:41 PM, Blogger ZoZOta

    عزيزتي هبه

    انا اعشق النص اللي اطلع منه بفايده

    شكرا على الإفاده

    اكيد راح اشترى الكتاب

    واكيد برجع لج

    عجبني منطقك وتفكيرج

     
  • At September 2, 2007 at 11:07 AM, Blogger ::heba::

    Roshal

    شكرا جزيلا لتلك الحروف الطيبه
    لمروركم شذى يطيب لي استنشاقه

    شكرا لدعمكم ولكلامكم الطيب ايضا
    وشكرا على اللقلب والزياره :D

     
  • At September 2, 2007 at 11:08 AM, Blogger ::heba::

    Ni3Na3aH

    شكرا لدعوتك الطيبه عزيزتي
    ولكي بالنثل انشالله : )


    من ناحيه الادب فهي قمه بالادب
    شكرا لج مره ثانيه : )

     
  • At September 2, 2007 at 11:09 AM, Blogger ::heba::

    Ra-1

    كلامج
    صحيح احيانا الصدف تعرفنا على ناس
    لها اثر كبير في تغير الي بداخلنا

    لوول شكرا على اللقب الاكشخ :p

     
  • At September 2, 2007 at 11:11 AM, Blogger ::heba::

    عيون الحب

    هي صدف ولكن صدف من نوع اخر
    تكون اشاره لنا لمواصله واكمال باقي
    الرحله التي اردناها : )


    شكرا لمرورك الكريم والعطر :)

     
  • At September 2, 2007 at 11:12 AM, Blogger ::heba::

    khaled

    شكرا لك ياخالد
    فعلا الصدف لها تأثيرات كبيره
    خاصه الحلو منها


    سعيده كونك حبيت الحوار :)

     
  • At September 2, 2007 at 11:13 AM, Blogger ::heba::

    ZoZOta

    تسلمين عزيزتي
    اتمنى لك قرائه مشوقه للكتاب
    وان تطلعي بفائده
    والمكان مكانج طبعا : )


    بالتوفيق:)

     
  • At September 7, 2007 at 5:14 PM, Blogger Ealaf

    :) حوار جميل وبهدف راقي ..
    أحب مثل تلك الصدف التي تجمعنا من أناس يستحقون الالتقاء بهم : )

    ان شاء الله سأشتري الكتاب , فأنا احب هذا النوع من الكتب