Saturday, September 29, 2007
سوالف القرقيعان : )


القرقيعان عاده رائعه تزيد من حلاوة شهر رمضان ..لمى لها من اثر في توطيد العلاقات بين الاهل والجيران الخ.....
في هذه السنه مرت علي العديد من المواقف خاصه في قرقيعان رمضان هذه السنه
جعلت البسمه ترتسم على شفتي : )
من هذه المواقف
كعاده الاطفال يأتون مجموعات للقرقيعان دخلوا مجموعه من الاطفال .. كانوا تقريبا 15
طفل من سن 12 الي سنتان
وكنت انا باستقبالهم
.
.
-------------------------------
.
.
.
.
اليكم الحوار
:P
.
ياحليلكم انتوا من عياله ياحلوين
.
اليهال: احنا عيال الفلان واحنا الفلاني واحنا العلنتاني
.
انا : والله والنعم فيكم
.
اليهال : من اسمه الي تبيون نقرقع له
.
انا: قولو مشاري
.
اليهال بصوت واحد : سلم مشاري يالله خل لامه يالله سلم مشاري يالله خل لامه يالله
عقب ماخلصوا من التقرقع بديت احط لهم قرقيعان بجياسهم
شدني واحد منهم كان شوي شيطان الله يحفظه وصلت صوبه وتوني بحط له قرقيعان
وانا احط
قالي منو مشاري هذا شكلج تحبينه ؟
.
انا اهني طالعته وقفت ماحطيت له قرقيعان وضحكت الصراحه قلت ليش انت لما تقرقع عند
الناس تسألهم منو الي تغنون له
.
ضحك وقالي لا ماقول
.
انا : عيل ليش قلت لي؟؟
.
اهو لانه انتي بنيه ومشاري ولد لازم نغني لج مو حق مشاري صح :P
لووول سمله عليه يعرف شلون يرقع لروحه
.
انا :اي صح بس مشاري ولد اختي وانا احبه وااايد
.
اهو : ياحظه مشاااري ودي خالتي امل تحبني جذي كله تقولي انت شيطان
.
لوول الصراحه مالوم خالتك امل ..اقول بقلبي
قلت انت شسمك .؟
.
قالي : اسمي عبد الرحمن وانتي شنو اسمج
.
انا : انا اسمي هبه بس تدري مدام اسمك عبدالرحمن ابيكم كلكم تقرقعون لعبد الرحمن
لانه اسمك حلو وانا احب كل عبدالرحمن بالدنيا :P
.
قرقعوا اليهال حق عبدالرحمن بصوت واحد وزدت لهم الجيله :P
واهما طالعين من البيت غنوا بصوت واحد سلم هبه يالله خلها لامها يالله
ماتوقعت بغنون لي بدون ما أطلبهم
:)
.
.
.
.
الي حبيت اوصله من الموقف الي صار
لاتستهين باي صغير وعامل الكل بالطيب تلقى الطيب بدربك وحواليك عامل الناس مثل
ماتحب ان الناس تعاملك ودائما انا اشوف هالشي من صغارو كبار..لاني اعاملهم
مثل ماحب الكل يعاملني ..والحمد الله انا اشوف الاحترام لي من الكل لاني احترم الكل
وبالاخر ماقول الا الله يحفظ هاليهال لاهلهم ويخلي عبدالرحمن لأمه وابوه واهم شي خالته امل
:P
.
.
______________________________
.
.
.
شكر خاص جدا للاخ منصور
على المقابله الجميله التي استضافني فيها
بموقعه
المميز ضوء
المقابله
 
posted by ::heba:: at 4:09 AM | Permalink |


34 Comments:


  • At September 29, 2007 at 2:12 PM, Blogger aThooB

    ماقدر اقول الا شي واحد بس

    هذا احلى بوست قرقيعان شفته بالمدونات الحالية :)


    اذا قرقعوا علينا بالهالوين بقولهم ماكو حلاو الا لما تقولون سلم عذوب هيهيههي كيفهم خل يتعلمون كويتي :P

     
  • At September 29, 2007 at 5:26 PM, Blogger Kuw_Son

    و سلم هبة يالله
    خلها لامها يالله


    يالله أهووووو .. فاتح الجيس حطيلي معاهم ..
    :P

    تستاهلين كل خير .. عرض الصور في الموقع مرتب و حلو :)

     
  • At September 30, 2007 at 7:04 AM, Blogger U_SF

    صج صج

    انا : هادئه
    فعلاً مع لوية اليهال وشطانتهم أحس انج كنتي هاديه معاهم مشالله عليج

    انا : طيبه
    الطّيب واضح من الحوار اللي دار بينج وبين عبدالرحمن


    انا : سعيدة
    سعادتج ملأت المدونات سعاده فشعرنا بالسعاده منج ^^


    انا : أحبكم
    والكل يحبك في الله ^^


    عادة القرقيعان عاده حميده وفيها ترسيخ لمعنى التواصل بين الجيران

    من كلامج عشت الجو اللي عاشوه الأطفال
    لما قرقعوا عليكم ..

    عاده تركت للصغار
    ورحلت عنّا : )

    الله يخليلكم مشاري ويتربى بعزكم انشالله

    يشكر الأخ عالمقابله ونتمنى يقابلونج بقنوات واذاعات لأن الكنز اللي عندج لازم يظهر وما لازم يتم مدفون بفلكر أو بالمجلات ونتمنى انه يكون لجميع الناس على مستوى الكويت

    انتي فاهمه قصدي .. نبي نشوف استيديو
    اسمه عالمي أنا وحدي .. بأقرب وقت ممكن .. عشان اييب بدّوري تصورينه :p


    وكل عام وانتي بخير ^^

     
  • At September 30, 2007 at 12:16 PM, Blogger ::heba::

    aThooB

    يابعد عمري والله عيونج انتي الحلوة: **
    لوووووووول
    اي ضروري يتعلمون واذا مافاد ايمعلج يهال ويغنون لج بالاسم :D

    جم عذوب عندي انا ;)

     
  • At September 30, 2007 at 12:17 PM, Blogger ::heba::

    Kuw_Son

    تسلم تسلم خالد
    يالله فج جيسك
    عشان احطلك :P

    مشكور يا خالد على مرورك الطيب وتعقيبك الاحلى : )

     
  • At September 30, 2007 at 12:20 PM, Blogger ::heba::

    U_SF

    يايوسف يايوسف والله ان كلامك جبير بحقي
    ماخفي سعادتي بمرورك وتعقيباتك الي توسع الصدر وتشرح النفس :)

    شكرا على التحليل الطيب هذا وصدقني
    لوما انت طيب جان ماتشوف الي حوالينك جذي :)

    وتسلم على الدعوة الحلوة لمشاري وربي يحفظلك بدور وكل غالي على قلبك انشالله

    وصدقني احنا في طور الخروج على الفلكر
    وزهب بدور والمدام وانشالله قريب بوجهه الدعوة لكم بالاستيديو اذا فتحت :)

     
  • At September 30, 2007 at 1:59 PM, Blogger Kuw_Son

    بعد حطيلي .. انبح صوتي و انا أقرقع و آخرتها جيلة وحدة
    :P

    سلم هبة يالله و خلها لامها يالله
    و سلم مشاري يالله و خله لامه يالله

    و سلم بيتهم يالله خله لفريجهم يالله
    :P

     
  • At September 30, 2007 at 3:13 PM, Blogger New Bride

    waaaaay eyanin hathaa 3bdelra7maan :)

    مشالله عليهم عيالنا حجيهم حجي كبار كبار

    روعة البوست

     
  • At September 30, 2007 at 9:27 PM, Blogger حلم جميل بوطن أفضل

    حقيقة لم أنتبه لموهبتك بالتصوير

    سأزور موقع فليكر على يوم و أعطيك رأيي

     
  • At October 1, 2007 at 9:52 AM, Blogger ::heba::

    Kuw_Son

    لوووول سلامه صوتك
    يبا اذا على جذي اخذ قرقيعان بيتنا كله :D

    وتسلم على التقرقع الطيب :P
    واهم شي بيتنا لفريجنا الصراحه
    :PPP

    والله ضحكتني يا خالد :PP

     
  • At October 1, 2007 at 9:53 AM, Blogger ::heba::

    New Bride

    اهو من ناحيه اينن فهو اينن الصراحه
    :D


    الحين ماكو يهال وانتي الصاجه
    الواحد يولد ريال سيده :PP

    تسلمين على مرورج الحلو والعذوب : )

     
  • At October 1, 2007 at 9:54 AM, Blogger ::heba::

    حلم جميل بوطن أفضل
    شكرا على مرورك الطيب
    وحياك الله باي وقت سواء اهني او بفلكر
    بالتوفيق :)

     
  • At October 1, 2007 at 11:55 AM, Blogger Shaima'a Alkandari

    بوست مميز وجميل وفيه حدث انكتب لنا

    بس ماشاءالله على هالياهل

    طالع شلون قالها بكل جرأه

    الله يعطيج العافيه على الصور الحلوه هذي وموهبه جميله لازم تنمينها وتواصلين فيها

     
  • At October 2, 2007 at 3:54 AM, Anonymous khaled

    نكهة الماضي المتبقية لـدينا
    هـي القرقعيان :)

    المهم أني اشارك عشان تنحرق أعصابج
    لا اللنك مايفتح معـاج :P

     
  • At October 2, 2007 at 11:23 PM, Blogger بعثرة مشاعر

    ياحلو القرقيعان و سنينة
    صج ان حق اليهال
    بس والله احنا نستانس أكثر
    ودي ودي البس بخنق و افرفر بين البيوت و اقرقع
    بس .... خلاص راحت علينا وشتقول ;p

     
  • At October 3, 2007 at 11:05 AM, Blogger Ra-1

    أهم شي منو مشاري شكلج تحبينه ;)
    hehhe :p

     
  • At October 3, 2007 at 12:06 PM, Blogger ::heba::

    Shaima'a Alkandari
    منوره شيماء المكان
    اي والله الحين ماكو يهال
    تفكيرهم صار تفكير كبار :D

    تسلمين على كلامج الطيب
    :)

     
  • At October 3, 2007 at 12:09 PM, Blogger ::heba::

    khaled

    اي والله كلامك بمحله
    الماضي له نكهه حلوه
    غير عن الحين حتى القرقيعان
    قبل كان غير :)


    لووول وعلى طاري اللنك صراحه
    صج يطفرني لاني ابي اكتب رد
    بس لنكك قافلها بويهي :PP

    على العموم سلامات وماتشوف شر
    من السخونه واجر وعافيه

    لاني ما اقدر ارد هناك:P

     
  • At October 3, 2007 at 12:10 PM, Blogger ::heba::

    بعثرة مشاعر

    حياج الله اختي :)
    وانتي الصاجه ايام قبل
    كانت غير عن الحين :D


    وبالعكس ماراحت ولاشي طقني بخنق
    وروحي قرقعي واذا تبين اي معاج من عيوني :P

     
  • At October 3, 2007 at 12:12 PM, Blogger ::heba::

    Ra-1

    لوووول
    شوفتي شلون هالياهل النزغه شقول
    :P

    شكل كلامه يازلج :PP

     
  • At October 3, 2007 at 8:24 PM, Blogger Najmah

    This comment has been removed by the author.

     
  • At October 3, 2007 at 8:26 PM, Blogger Najmah

    الله ياحلاتهم اليهال لما ايوون يقرقعون

    بس اسمع الجرس على طول اطلع لهم
    صج استانس عليهم :)

    الله يخلي لكم مشاري ويحفظه
    ويخلي عيدالرحمن لأهله

     
  • At October 4, 2007 at 3:57 AM, Blogger Mishari

    اول شى وناسة لان نفس اسمى
    /:)

    ثاني شى

    مشكلة خريجين الاعلام
    ;)
    لازم مسوين ربكة

     
  • At October 4, 2007 at 12:22 PM, Blogger ::heba::

    Najmah

    اللهم امين تسلمين على الدعاوي الطيبه
    الله يحفظهم ويخليهم :) ويحفظ كل من يعز على قلبج:)


    اي اهي من ناحيه وناسه فوناسه
    عشى الله يخلينا من عواده كل عام :)

     
  • At October 4, 2007 at 12:23 PM, Blogger ::heba::

    Mishari

    اي هذا السمي
    :p

    وبعدين احنا الاعلاميين حبوبين
    مانسوي ربكات ابدا :p

    مشكور اخوي مشاري على مرورك:)

     
  • At October 5, 2007 at 2:12 AM, Anonymous khaled

    تسملين يالشيخة
    والشـر ماييج أن شاللة

     
  • At October 5, 2007 at 11:58 PM, Blogger KeChie-ChaN

    تدرين كل شي موجود و المواقع تصير يومياً حوالينا لكن الشاطر بس إللي مو مجرد يشوف لكن يلاحظ و يفهم الحكمة منها

    يحليل هالعبد الرحمن .. قصه ههه .. يلا عساكم من عواده = )

     
  • At October 7, 2007 at 10:53 PM, Blogger جنون إحساس

    سلم هبه يالله
    :)


    يا حلاة حجي اليهال ويا حلو سوالفهم
    ما ينمل منهم والله
    اهما فرحة هالوجود

    يحليل حمني اهوا وخالته أمل
    =)
    ---

    هبه
    من هالبوست لمست فيج الشفافية
    والطيبة بشكل أكبر

    عسى الله يحفظج

    ومقابلة رائعة

     
  • At October 9, 2007 at 1:24 AM, Blogger Nescafé

    LOL
    يحليله احب اليهال اللي جذي
    احس فيهم ذكاء سمالله عليهم

    تخيلي هبونه انا السنه قلت حق بيتنا لي يو يهال قولولهم يقرقعون باسمي.. ومحد معطيني ويه بالبيت
    ذاك اليوم تزبرت بالبيت وانطر اليهال اييوون.. قلت لهم قرقعو باسمي .. (اول شي خل اشرح لج الوضع اللي يايين 3 بنات وولد وبنتين بس يقرقعون والباجي ساكتين موحافظين) ههههه
    المهم قالو (قرقيعان وقرقيعان بيت قصير و(((((ربيعان))))) ) وبس يعيدونها!!!! موحافظين الباجي! وجيكي على ربيعان مادري ليشششش
    hehehe

    ومحد قرقع باسمي.. بس خلااص طاب خاطري
    ;P

     
  • At October 9, 2007 at 5:48 AM, Blogger ::heba::

    khaled
    وياك يارب
    تسلم اخوي : )


    KeChie-ChaN
    كلامج عين الصواب
    كلنا نمر بمواقف شبه يوميه
    لكن بكل موقف حكمه لازم نلاحظها :)

    مرورج بحد ذاته له معني كبير
    الله لايحرمنا :)

     
  • At October 9, 2007 at 5:51 AM, Blogger ::heba::

    This comment has been removed by the author.

     
  • At October 9, 2007 at 5:53 AM, Blogger ::heba::

    جنون إحساس
    ويسلمج ربي ويخليج انشالله
    وطولنا بعمرج :)

    اليهال عالم
    احبه ابحر فيه
    واستمتع بأدق تفاصيله :)

    تدرين ليش تشوفيني جذي
    لانج انتي جذي ..طيبه وقريبه
    من الكل :)

    ربي يدوم عليج هالروح الحلوة ويخليج لأهلج ولنا اكيد :)

    October 9, 2007 5:51 AM

     
  • At October 9, 2007 at 5:59 AM, Blogger ::heba::

    Nescafé

    اي اي حدهم يشوقون مو :P

    لووووووووووول تصدقين كسرتي خاطري
    يوم يو اليهال يو شويه وفوق هذا مو
    حافظين لووول لالا بدعتي جنج :pPp

    ولا قالوا ربيعان :ppp

    ولا يهمج ايج بيتكم واقرقعلج افااااا
    عليج انتي تامريني امر :D

     
  • At October 12, 2007 at 12:03 PM, Blogger 5roofa

    عيدج مباارك يالحلوه


    salamz sweetee...